catholic fidei: Si Hesus ay Tunay na Diyos at Tunay na Tao

Ang Simbahang Katoliko ay naniniwala sa doktrina ng Inkarnasyon o ang turo na si Hesus ay 'tunay na Diyos at tunay na tao'. Bagamat madali itong sabihin, tulad ng maraming bagay sa ating buhay-pananampalataya, naglalaman ito ng isang napakalalim na misteryo. Ang Inkarnasyon ay nagsasalamin ng hindi lamang kalikasan ng Diyos, kung hindi nagsasalaysay din ito ng kasaysayan ng ating kaligtasan. Mainam na tayo ay palagiang magnilay ukol sa Inkarnasyon at kung ano ang implikasyon nito sa ating pang-araw-araw na buhay.

Ano ba ang Inkarnasyon (o mas kilala sa Tagalog na 'Pagkakatawang tao')?

Ayon sa simbahan, ang Inkarnasyon ay ang pagpapatotoo ng ang Salita ay naging isang tunay na tao. Ang Diyos Ama ay nakiisa sa sangkatauhan may 2,000 tao na nakakaraan at naglakad sa ating daigdig sa katauhan ni Hesu-Kristo. Ginawa Niya ito upang (a) maligtas tayo sa pagkaalipin sa ating mga kasalanan, (b) upang ipahayag sa atin ang walang-maliw na pagmamahal ng Diyos, (k) upang maging huwaran natin bilang Daan, Katotohanan at Buhay at (d) ibahagi sa atin ang kanyang pagiging Banal na Anak (CBCP, Katesismo para sa mga Pilipinong Katoliko 533).

Tandaan na ang pagka-Diyos at pagka-tao ni Hesus ay hindi dalawang hiwalay na kalikasan, kung saan minsan ay Diyos si Hesus, minsan naman Siya ay tao. Kung hindi, ang lahat-lahat ng kilos ni Hesus ay sabay na gawain ng Diyos at gawain ng isang tao. Hindi Siya Diyos na nagpapanggap na isang tao; Siya ay tunay na nagutom, nasaktan at nakaramdam ng iba'-ibang damdamin noong Siya ay nabubuhay sa mundo---tulad din nating lahat. Hindi rin Siya tao na sinusubaybayan lang ng Diyos tulad ng turo ng ibang mga sektang Kristiyano. Sa Kanyang sarili ang perpektong ugnayan ng kalikasang Diyos at Tao.

Ang Kalikasang Diyos ni Hesus

Sa Lumang Tipan pa lamang makikita na natin na nasa plano ng Ama ang pagka-Diyos ni Hesus. Sinabi ng propetang si Isaias: "Ang Diyos mismo ang darating at magliligtas sa inyo" (Isaias 35:4). Sinabi ni Isaias na ang Mesiyas o ang takdang Tagapagligtas ay magngangalang "Emmanuel" na nangangahulugang "Ang Diyos ay Kapiling Natin." Tinawag din ni Isaias ang Mesiyas na 'isang makapangyarihang (o malakas sa ibang pagsasali) Diyos.' ( Isaias 9:6). Ang Ebanghelyo ni Mateo (Mateo 1:23) ang nag-ugnay na si Hesus nga ang tinakdang Tagapagligtas na ito.

Ang Bagong Tipan ay siksik sa mga akda na nagtuturo sa kalikasang Diyos ni Hesus. Kung tutuusin nga, kaya hindi matanggap ng mga Hudyo noon (at ngayon!) si Hesus ay dahil nagbitiw Siya ng mga pananalita at pagkilos na tanging Diyos lamang ang may karapatang at kakayahan na magsabi o magsagawa. Siya ay nagpatawad ng mga kasalanan, nagsagawa ng milagro, nagtakwil ng demonyo, at nangaral ng may awtoridad ng Diyos. Binago Niya interpretasyon ng karamihan ng mga batas na sinusunod ng mga Hudyo, mga batas na galing mismo sa Diyos! Ilang ulit Niyang sinabi "Sundan niyo ako." Hindi "Ako'y mensahero lamang" kung hindi "Sundan niyo ako." Aba't sobrang mapangahas naman ng taong ito na gawin ang mga bagay na tanging Diyos lang ang dapat gumawa! Ngunit katanggap-tanggap ito sapagkat Siya na nga ang Diyos.

May ilang ulit sa Ebanghelyo na ginamit ni Hesus ang katagang "Mesiyas" at "Anak ng Diyos" bilang pagtukoy sa Kanyang Sarili. Ginawa niya ito sa kabila ng katotohanan na sa ituinuturing na napakalaking kahangalan ang paggamit ng ganitong pananalita. Kung titingnan nga ay baka hindi naipako si Hesus kung sasabihin lamang Niya na hindi Siya ang tunay na Mesiyas. Ngunit ito ay kanyang pinanghawakan sa kabila ng posibleng kamatayan.

Ang kaganapan sa Juan 10:23-35 ay isang napakatingkad na ilustrasyon ng bagay na ito:

"Naganap sa Jerusalem ang kapistahan ng pagtatalaga. Noon ay taglamig. Si Jesus ay naglalakad sa templo sa portiko ni Solomon. Pinalibutan nga siya ng mga Judio. Sinabi nila sa kaniya: Hanggang kailan mo paghihintayin ang aming kaluluwa? Kung ikaw ang Mesiyas, sabihin mo sa amin nang tuwiran.

Sumagot si Jesus sa kanila: Sinabi ko na sa inyo ngunit hindi kayo sumampalataya. Ang mga gawang ginagawa ko sa pangalan ng aking Ama ang siyang nagpapatotoo sa akin. Hindi kayo sumasampalataya sapagkat hindi kayo kabilang sa aking mga tupa gaya ng sinabi ko sa inyo. Dinirinig ng aking mga tupa ang aking tinig. Kilala ko sila at sumusunod sila sa akin. Binibigyan ko sila ng buhay na walang hanggan. Hindi sila malilipol magpakailanman. Walang sinumang makakaagaw sa kanila sa aking kamay. Ibinigay sila sa akin ng aking Ama. Siya ay higit na dakila sa lahat. Walang makakaagaw sa kanila mula sa kamay ng aking Ama. Ako at ang Ama ay iisa.

Muli ngang dumampot ng mga bato ang mga Judio upang siya ay batuhin. Sinabi sa kanila ni Jesus: Maraming mabubuting gawa ang ipinakita ko sa inyo mula sa aking Ama. Alin sa mga gawang iyon ang dahilan para batuhin ninyo ako?

Sumagot ang mga Judio sa kaniya na sinasabi: Hindi ka namin binabato dahil sa anumang mabuting gawa kundi dahil sa iyong pamumusong. Ginagawa mong Diyos ang sarili mo, ikaw na isang tao."

Mababasa din sa Mateo 62-65 na pinangatawanan ni Hesus sa Kanyang tunay na kalikasan hanggang sa panahon ng posibleng kamatayan:

"Tumayo ang pinakapunong-saserdote at sinabi sa kaniya: Wala ka bang isasagot? Ano itong ipinaparatang ng mga saksing ito laban sa iyo? Ngunit si Jesus ay nanahimik.

Sinabi ng pinakapunong-saserdote sa kaniya: Inuutusan kita sa pamamagitan ng buhay na Diyos. Sabihin mo sa amin kung ikaw ang Mesiyas, ang Anak ng Diyos?

Sinabi ni Jesus sa kaniya: Tama ang iyong sinabi. Gayunman, sinasabi ko sa iyo: Mula ngayon ay makikita mo ang Anak ng Tao na nakaupo, siya ay makikita mo sa kanang kamay ng Makapangyarihan at dumarating sa mga ulap ng langit.

Nilibak ng mga Kawal si Jesus. Pinunit ng pinakapunong-saserdote ang kaniyang damit. Sinabi niya: Siya ay namusong. Bakit kailangan pa natin ang mga saksi? Narito, narinig ninyo ang kaniyang pamumusong. Ano ang palagay ninyo?

Sumagot sila: Siya ay nararapat na mamatay!"

Sinabi ni Hesus sa harap ng maraming tao na Siya nga ang Mesiyas. Makikita na para sa mga Hudyo noong panahon na iyon, ang pag-amin na Siya ang Mesiyas ay nangangahulugan na sinasabi Ni Hesus na Siya ay Diyos. Kung sinasabi lamang Niya na Siya ay isang propeta, bakit magagalit ang punong-saserdote? Marami na namang propeta ang dumaan sa kasaysayan ng mga Hudyo. May sinasabi si Hesus na lubhang nakaka-iskandalo sa mga tao noong panahon na iyon, at ito nga na Siya ay higit sa ordinaryong mamamayan.

Ang bagay na ito ay pinangatawanan din ng unang Iglesia, ayon sa testimonya ni San Pablo na binigyan mismo ng Panginoon ng kaalaman ukol sa Kanya. Ang ilang mga sulat ni Pablo ay nagpapatotoo dito, tulad ng mga sumusunod:

Sulat sa mga Taga-Filipos 2:5-8
"Ito ay sapagkat kailangang taglayin ninyo ang kaisipan na na kay Cristo Jesus din naman. Bagaman siya ay nasa anyong Diyos, hindi niya itinuring na kailangang pakahawakan ang kaniyang pagiging kapantay ng Diyos. Bagkus ginawa niyang walang kabuluhan ang kaniyang sarili at tinanggap niya ang anyo ng isang alipin at nakitulad sa tao. 8Yamang siya ay nasumpungan sa anyong tao, siya ay nagpakumbaba at naging masunurin hanggang sa kamatayan, maging sa kamatayan sa krus."

Sulat sa mga Taga-Colosas 2:9
"Ito ay sapagkat nananahan sa kaniyang katawan ang lahat ng kapuspusan ng kalikasan ng Diyos."

Sulat sa mga Taga-Colosas 1:16
"Ito ay sapagkat sa pamamagitan niya, nilalang ang lahat ng mga bagay na nasa langit at mga bagay na nasa lupa, mga bagay na nakikita o hindi nakikita. Ito man ay mga luklukan, o mga paghahari, o mga pamunuan, o mga pamamahala. Ang lahat ng bagay ay nilalang sa pamamagitan niya at para sa kaniya."

CatholicFidei

Catholic Teaching in the Light of the Saints...

Post a Comment